Uleg ya Telek

Say kuwanda

say anlong ed narengel

tan makasulat ka labat

nu makadngel ka.

-

Sakey ya kabuwasan

abangonan kon

walay mankukurong-kurong

wa andeket a linya

ed datal.

-

Anengneng met nen inak

tan amak.

"Atan may uleg ya telek

nu tawagen da,"

kuwanen inak.

-

Melmelag so uleg,

singa bulaten

maimimpis,

natatakot,

nababalang.

-

Angala ak

na melag ya papel

tan pakukurungen kod satan

so kasiyan ya uleg.

-

"Patey mo la ta

ampano ombalbaleg!"

ganggan nen amak.

Agak inmesel.

Singa ak naemel.

-

Kinurong nen uleg so papel

tan imbulos kod paway

so melag ya pinalsa.

-

Nantongtong kamin duwa

lapud say uleg

et telek labat aliwan bulag

tan lalon

aliwan agmakalikna.

-

"Salamat," kuwanto.

Inebatan ko.

"No pinatey taka,

agko amta nu siopan talaga so mas telek

ed sikata.

Lapud agko arengel

so akis mo

tan pikakasim

ya kasian ka."

-

Anggapoy inmesel.

Singa amin naemel.

Agko amta nu agto nadngel

lapud batik ya kuyapos

odino lapud talagan

agmakadngel

so sayan melag

ya uleg

ya telek.