Nipaakar ed anto ya?

Ngalngali anggapo so mansusulat o mangagaway antukaman ya creative work ya nisulat ed Pangasinan. Nu wala man, mairirap ya almoen. Nu naalmo man, mairirap ya talosan ta nisulat ed araldalem ya Pangasinan. Agla pankelawan sirin ya ondaraiset lay mansasalita na Pangasinan, tan mataltalag ya nanausar so Pangasinan ed makabaliksan tan aralem iran pantotongtong.

Sayan email newsletter et sakey ya paraan piyan napawil koy inmunan salitak. Moryaen kon sakey ya melag ya kontribusyon iya ed baleg ya kimey ya pangisalba ed ompapatey ya salita tayo.

Antoy karga na saya?

Nu man-subscribe ka, makaawat kay ananlong (poems), isistorya (stories), papatalos (translations), tan arum nira. Amin et nisulat ed Pangasinan. Kapan-subscribe mo, sarag mo met so mankomento tan man-share ed saray nabasam.

Antoy kabaliksan na “mantaltaliwa”?

Anggapoy kopyak na diksyunaryon Pangasinan, balet say antak, sayan salita et mipadpara ed salitan Ingles ya “meditate”. Kada manbisikleta ak ed pegley na saray daralosan tan ontutunda ak pyan pankelawan so onseselek lan banwa, say kuwanen amak, “Mantataltaliwa ka lalango la.”

Siopa so walad beneg na saya?

Vince Imbat so ngaran ko. Man-eedit ak ed Ingles. Abayag ak lan mansusulat ed Ingles tan Filipino. Nen 2019, nagmaliw ak ya fellow na sakey ya programan manpapasal na saray managpatalos. Onggagapo ak lan manpapatalos ed Filipino tan, nagkalaotla, ed Pangasinan. Manaanlong ak met tan mando-drawing. Masiba ak na buro tan kamatis.

Panon kabetbet so pakaawat moy email?

Basta walay balon nisulat ko, ipawit kon tampol. Mabetbet la tay mamitlod sakey simba. Nu arum nayarin agka makaawat ya tampol ta mantitipon ak ni isulat ko. Balet alalagar mo ta onsabin-onsabi.

User's avatar

Subscribe to Mantaltaliwa

Ananlong, isistorya, papatalos, tan ambabangil niran nisulat ed Pangasinan.